У Расіі ўзбудзілі крымінальную справу супраць Дурава
- 24.02.2026, 10:47
Заснавальніка Telegram абвінавачваюць у «садзейнічанні тэрарыстычнай дзейнасці».
Расійскія праваахоўныя органы расследуюць дзеянні заснавальніка Telegram Паўла Дурава у межах крымінальнай справы аб садзейнічанні тэрарыстычнай дзейнасці (частка 1.1 артыкула 205.1 КК РФ), паведамілі «Расійская газета» (РГ) і «Камсамольская праўда» (КП) са спасылкай на матэрыялы ФСБ. У артыкулах сцвярджаецца, што ў умовах вайны Telegram «стаў галоўным інструментам спецслужбаў краін НАТА і «кіеўскага рэжыму». «Ілюзія ананімнасці прывяла ў месэнджар арміі радыкалаў, наркаманаў, забойцаў і тэрарыстаў, што пачало ствараць пагрозы нашаму грамадству», — падкрэсліла РГ.
Паводле звестак выданняў, ад пачатку поўнамаштабнай вайны ва Украіне ў Расіі зарэгістравалі больш за 153 тыс. злачынстваў з выкарыстаннем месэнджара, з якіх 33 тыс. — дыверсійна-тэрарыстычныя і экстрэмісцкія, уключаючы арганізацыю выбухаў, падпалаў ваенкаматоў і забойстваў. У прыватнасці, у выніку тэрактаў, якія каардынаваліся праз Telegram, загінулі дзевяць высокапастаўленых ваеннаслужачых, у тым ліку генерал-лейтэнанты Ігар Кірылаў, Яраслаў Маскалік і Фаніль Сарвараў. Акрамя таго, месэнджар быў задзейнічаны ў арганізацыі тэракту ў «Крокус Сіці Холе» і пры забойстве Дар’і Дугінай, гаворыцца ў артыкулах.
Разам з тым, як адзначае КП, Telegram не выканаў патрабаванні Раскамнагляду аб выдаленні 154 981 каналаў, чатаў і ботаў, сярод якіх 104 093 — датычыліся недаставернай інфармацыі, 10 598 — заклікаў да экстрэмізму, 7405 — судовых рашэнняў, 4168 — апраўдання экстрэмісцкай дзейнасці. У сувязі з гэтым расійскія ўлады прынялі рашэнне аб абмежаванні працы месэнджара ў Расіі і на дадзены момант запаволілі яго працу на 55%, удакладніла РГ.
Пра тое, што Раскамнагляд пачаў блакаваць Telegram, стала вядома 10 лютага. У ведамстве патлумачылі гэта тым, што месэнджар не выконвае расійскае заканадаўства і не забяспечвае бяспеку грамадзян. Пры гэтым у Раскамнаглядзе падкрэслівалі, што запавольваюць Telegram «па рашэнні ўпаўнаважаных органаў».
На гэтым фоне дырэктар ФСБ Аляксандр Бортнікаў заявіў, што перамовы з Дуравым у мінулым «ні да чаго добрага» не прывялі і на дадзены момант не вядуцца. «Ён пераследуе свае карыслівыя інтарэсы, якія ў канчатковым выніку выліваюцца ў наяўнасць вялікай колькасці правапарушэнняў — як дзіцячай злачыннасці, пра якую мы пастаянна гаворым, тэрарыстычных актаў, дыверсій», — адзначаў Бортнікаў.