Белгідрамет раптоўна абвясціў аранжавы ўзровень небяспекі

• 24.02.2026, 11:41

З-за туману.

Белгідрамет раніцай 24 лютага раптоўна павысіў узровень небяспекі з жоўтага да аранжавага для большай часткі Беларусі. Пагрозу для 6,8 млн беларусаў уяўляе туман, які захаваецца да вечара аўторка.

Аранжавы ўзровень небяспекі сіноптыкі абвясцілі для Брэстчыны, Віцебшчыны, Гродзеншчыны і Міншчыны. У суме ў гэтых рэгіёнах (разам з Мінскам) пражывае 6,8 млн чалавек, паводле звестак Белстата.

Бачнасць у туманах складзе ўсяго 100–500 метраў, таму вадзіцелям і пешаходам варта быць надзвычай уважлівымі на дарогах. Небяспечны туман у Брэсцкай, Віцебскай, Гродзенскай і Мінскай абласцях захаваецца да 21-й гадзіны 24 лютага.

Тым часам на Гомельшчыне і Магілёўшчыне застаецца жоўты ўзровень небяспекі. Разам з ім — галалёдзіца па ўсёй рэспубліцы.