Навукоўцы выявілі цікавую асаблівасць кошак

• 24.02.2026, 16:46

Праведзена новае даследаванне.

Людзі і кошкі ўзаемадзейнічаюць ужо тысячы гадоў. Нароўні з сабакамі кошкі з'яўляюцца аднымі з самых папулярных хатніх жывёл. У той час як сабакам пастаянна патрэбная падтрымка чалавека, кошкі — больш незалежныя жывёлы.

Як паказала новае даследаванне, ім можа быць камфортна як са сваім гаспадаром, так і з незнаёмым чалавекам. Яно апублікавана ў часопісе Applied Animal Behaviour Science, піша The Independent (пераклад — «Фокус»).

У межах даследавання венгерскія навукоўцы вывучалі паводзіны 15 тэрапеўтычных кошак, навучаных атрымліваць задавальненне ад падарожжаў у новыя месцы, а таксама 13 звычайных хатніх кошак. Іх змясцілі ў адзін пакой і вывучалі іх рэакцыю на гаспадара і на незнаёмага чалавека.

Вынікі даследавання паказалі, што тэрапеўтычныя кошкі аднолькава добра ставяцца як да свайго гаспадара, так і да незнаёмых людзей. У той жа час рэакцыя звычайных хатніх кошак на сваіх гаспадароў і незнаёмцаў практычна не адрознівалася, то бок яны паводзілі сябе амаль аднолькава побач з гаспадаром і з незнаёмым чалавекам. Гэта назіралася нават тады, калі гаспадары кошак пакідалі пакой.

Навукоўцы кажуць, што гэта даследаванне даказвае адсутнасць прывязанасці ў кошак да сваіх гаспадароў. Інакш кажучы, у кошак няма залежнасці ад чалавека, бо гэтыя хатнія жывёлы жывуць побач з намі на роўных, кажуць навукоўцы.

Паводле аўтараў даследавання, суіснаванне кошак і людзей прыносіць абодвум бакам узаемную выгаду. Але сабакі сталі залежнымі ад чалавека, тады як кошкі засталіся незалежнымі драпежнікамі і, па сутнасці, ім усё адно, хто побач, абы гэты чалавек прыносіў выгаду.

Каб вызначыць, ці залежаць жывёлы ад сваіх гаспадароў, навукоўцы вымяраюць ступень прывязанасці гадаванца да чалавека, узровень трывожнасці, якая праяўляецца пры адсутнасці гаспадара, і, нарэшце, прыняцце незнаёмца. Падобнае даследаванне раней праводзілася для сабак, і навукоўцы выявілі, што гэтыя хатнія жывёлы маюць вельмі залежныя адносіны тыпу «дзіця—бацька» са сваім гаспадаром. Але ў кошак няма такіх залежных адносін.

Наступным разам, калі вы будзеце гладзіць сваю кошку або ката, можаце задумацца над тым, што насамрэч думаюць пра вас тыя, хто, як вам здаецца, не могуць без вас жыць.