У Мінску жанчыне правялі рэзекцыю печані з дапамогай робата

• 24.02.2026, 21:54

Аперацыю правялі 19 лютага.

У Мінскім навукова-практычным цэнтры хірургіі, транспланталогіі і гематалогіі пацыентцы правялі робат-асіставанае выдаленне часткі печані, паведаміла ўстанова.

Аперацыю правялі 19 лютага. Гэта першая робатызаваная рэзекцыя печані на робакамплексе Medbot у згаданым цэнтры.

Пацыентка ўжо адчувае сябе добра і рыхтуецца да выпіскі.

Спецыялісты пералічылі перавагі робатызаванай хірургіі печані:

найвышэйшая дакладнасць: 3D-візуалізацыя высокага дазволу забяспечвае дэталёвы агляд анатоміі, сасудаў і жоўцевых паратокаў;

мінімальная страта крыві;

доступ да складаных зон — сем ступеняў свабоды інструментаў дазваляюць аперыраваць у цяжкадаступных пры лапараскапіі сегментах печані;

мінімальная траўматызацыя тканак скарачае тэрміны шпіталізацыі;

зніжэнне ўскладненняў — менш раневых інфекцый, пасляаперацыйных боляў і агульнай захворвальнасці.

«Укараненне робатызаванага комплексу адкрывае новую эру ў лячэнні ачагоўных паражэнняў печані і выводзіць беларускую хірургію на сусветны ўзровень», — гаворыцца ў паведамленні ўстановы.

Яшчэ ў пачатку лютага спецыялісты МНПЦ упершыню самастойна правялі аперацыю на новым абсталяванні — пацыентцы з захворваннем жоўцевай бурбалкі і печані. Тады ж быў падпісаны дакумент аб далейшым супрацоўніцтве беларускага цэнтра з кітайскай кампаніяй — вытворцам робатызаванага комплексу.