На дзяржаўным радыё РФ прызналі: Расія сыходзіць на сусветныя задворкі

• 25.02.2026, 11:28

Санкцыі працуюць.

Да канца 4-га года вайны дзяржаўная прапаганда Расіі пачала адкрыта казаць пра дэградацыю краіны: эканамічную, прамысловую і інтэлектуальную.

Нечаканая праўда прагучала ў эфіры прапагандысцкага радыё «Комсомольская правда» з вуснаў Z-палітолага Алега Бандарэнкі, перадае Dialog.UA.

Расійскі эксперт заявіў пра дэградацыю трох важных сфер у РФ: навукі, адукацыі і сферы тэхналогій. Іх стан ён апісаў як «жахлівы».

«Мяне вельмі непакоіць тое, што я адчуваю на кончыках пальцаў, — гэта правінцыялізацыя Расіі. Правінцыялізацыя ў сусветным кантэксце. Калі яшчэ літаральна да ўчарашняга дня Расія была ў многіх галінах адным з лідараў або, прынамсі, замахвалася на тое, каб быць адным з лідараў, дык апошнія 4 гады мы імкліва, на жаль, дэградуем, сыходзім на сусветныя задворкі. Пра гэта трэба мець смеласць шчыра сказаць», — заявіў Бандарэнка.

Асабліва моцна ён абураўся тым, што Крэмль і сілавікі фактычна паралізавалі навуковыя даследаванні ў РФ, забараніўшы супрацоўніцтва з Захадам.

Ён адзначыў «маразматычныя забароны» з боку ўладаў. Z-эксперт таксама прыгадаў наймацнейшую дэградацыю авіяцыйнай галіны ў Расіі. Усё гэта, паводле яго слоў, — вынік санкцый, якія сапраўды працуюць.

«Зусім нядаўна з’явіліся навіны пра тое, што адна авіякампанія адмяніла цэлую сетку маршрутаў з прычыны паломкі “Боінга”. Гэта не супадзенне, не выпадковасць, гэта ўжо сістэма! (…) Давайце скажам шчыра — санкцыі цяпер, ужо на 5-м годзе вайны, узялі сілу! Яны падзейнічалі! Не трэба гэтага хаваць! Не трэба прыкрывацца і казаць: “А нам усё адно”. Не, не ўсё адно! Санкцыі працуюць. І расійская эканоміка цяпер гэта на сабе адчувае!» — сказаў Бандарэнка.

Ён выказаў прэтэнзіі Крамлю за ўвядзенне ў РФ утылізацыйнага збору на замежныя аўтамабілі, што рэзка павысіла цэны на рынку. «Я разумею, што ёсць жаданне дзяржавы забяспечыць працай пару мільёнаў чалавек, якія збіраюць расійскі аўтапрам. Але чаму мы за гэта павінны ўсе плаціць?» — задаў пытанне Бандарэнка.

Z-вядучы «Комсомольской правды» Іван Панкін, слухаючы гэтую абураную прамову калегі, толькі сумна ківаў галавой, пагаджаючыся са сказаным.