У Мінску сілавікі накрылі цэлую сетку Call-цэнтраў
- 25.02.2026, 14:23
Затрымалі дзесяткі чалавек.
У Мінску спыненая дзейнасць чатырох махлярскіх call-цэнтраў, паведамілі раніцай 25 лютага ў прэс-службе Следчага камітэта.
17 лютага сілавікі затрымалі 55 чалавек, датычных, паводле версіі следства, «да дзейнасці міжнароднай арганізаванай злачыннай групы».
Паводле інфармацыі МУС, фігуранты дзейнічалі больш за пяць гадоў. Іх ахвярамі сталі тысячы людзей з больш чым 180 краін.
Два call-цэнтры махляроў працавалі ў Мінску і мелі адзіны дыстанцыйны цэнтр кіравання. Іх функцыянаванне забяспечвалі сем аддзелаў, што мелі розную махлярскую спецыялізацыю.
Каб злачынная схема не выклікала пытанняў у ўладаў, зламыснікі зарэгістравалі ў нашай краіне тры фірмы. Іх віды дзейнасці былі: стварэнне рэкламы, аказанне ІТ-паслуг, дзейнасць тэлефонных даведачна-інфармацыйных службаў
Зламыснікі выманьвалі грошы сваіх ахвяр пад выглядам інвестыцыйнай дзейнасці на рынку Forex.
Кліентаў яны прыцягвалі праз таргетаваную рэкламу. Аб’явы накіроўвалі карыстальнікаў на падкантрольныя зламыснікам сайты — усяго выяўлена больш за 900 такіх рэсурсаў.
«Праз электронныя анкеты яны збіралі даныя грамадзянаў і, прадстаўляючыся «фінансавымі спецыялістамі», упэўнівалі іх пералічваць грошы на фіктыўныя рахункі», — распавялі ў СК.
Далей на падробленых платформах махляры імітавалі паспяховы гандаль і пад рознымі падставамі прымушалі працягваць уносіць усё новыя сумы.
Насамрэч грашовыя сродкі пацярпелых аседалі на «дропаўскіх» рахунках альбо ў крыптакашальках. Каб схаваць махлярскую схему і ўсыпіць пільнасць «інвестараў», на падкантрольных платформах ім прадастаўляліся падробленыя справаздачы і ілжывыя звесткі пра даходнасць аперацый, створаныя з выкарыстаннем інфаграфікі і іншых візуальных матэрыялаў.
Як распавялі ў Следчым камітэце, штомесячны абарот аднаго з махлярскіх цэнтраў складаў ад 600 тысяч да 2 млн долараў. Сярэдні ўзрост удзельнікаў — ад 20 да 38 гадоў. Большасць маюць вышэйшую адукацыю, сям’ю і імкнуцца да лёгкага заробку. Супрацоўнікі аддзела першаснай апрацоўкі пацярпелых атрымлівалі за месяц каля 500 долараў. Іх калегі, якія працягвалі схіляць ахвяр да інвеставання, атрымлівалі ад 1000 долараў. Шмат хто з фігурантаў падчас допытаў распавёў, што іх заробак складаў ад 3000 да 4000 долараў. Кіраўнік двух call-цэнтраў у Мінску атрымліваў у раёне 5000 долараў.
Па крымінальнай справе праведзена 78 ператрусаў. Вылучылі камп’ютарную тэхніку, мабільныя прылады, дакументы і электронныя носьбіты інфармацыі. Таксама выяўлена больш за 700 тысяч рублёў і 11 аўтамабіляў. Накладзены арышт на 47 рахункаў падкантрольных суб’ектаў гаспадарання — на іх заблакавана звыш 1 млн долараў.