На трасе Брэст — Маларыта адкрыюць карчму з кальянам і «музеем ВАВ»

• 25.02.2026, 16:05

У ўстанове плануюць аб’яднаць бар, дыскатэкі і «музей» з ваеннай атрыбутыкай.

На скрыжаванні дарог Брэст — Маларыта — Кобрын у будынку былога паста ДАІ ў бліжэйшыя месяцы плануюць адкрыць карчму «Мандарыновы гусь», паведамляе @BGazeta.

Праект анансаваў праўладны блогер ПалВаныч з Кобрына. Паводле яго слоў, гэта добрая навіна не толькі для жыхароў Маларыты. Установа будзе спалучаць бар, дыскатэкі і кальян з куточкам-музеем Вялікай Айчыннай вайны.

Менавіта такая канцэпцыя выклікала крытыку ў часткі беларусаў. Некаторыя лічаць, што фармат з алкаголем і забаўляльнымі мерапрыемствамі дрэнна спалучаецца з ваеннай тэматыкай, а сама ўстанова можа не праіснаваць доўга.

Паводле слоў блогера, на першым паверсе размесцяцца барная стойка, столікі і тэлевізар. На другім паверсе арганізуюць «невялікі куточак музея ВАВ», дзе плануюць праводзіць сустрэчы з ветэранамі, якія змогуць распавядаць пра вайну.

У відэа блогер пагутарыў з уласніцай будучай карчмы Іннай. Яна адзначыла, што ідэя адкрыцця з’явілася пад уплывам сям’і з Расіі.

«Ініцыятыва прыйшла з Расійскай Федэрацыі. Назва таксама адтуль, гэта любімая назва ўстановы маіх дзяцей, дзе мы адпачываем. Вось і вырашылі ўвасобіць гэта ў нашу мару, адкрыць тут», — расказала Інна.

Паводле яе слоў, установа будзе разлічана на адпачынак і сустрэчы людзей 40+, а ў VIP-зале з’явіцца кальян.

«Уваход там будзе платны. Адпаведна, і абслугоўванне будзе зусім іншым. Будзе пасуда, звязаная з Вялікай Айчыннай вайной. Думаю, спадабаецца. Спадзяюся, у першую чаргу маларытцы падтрымаюць нашу ініцыятыву. Прыедуць, паглядзяць, будуць адпачываць».