Частку трупаў нават не закапвалі: шакавальныя падрабязнасці падзежу жывёлы пад Клецкам

• 25.02.2026, 18:06

Жывёл часткова засыпалі снегам, не выконваючы санітарныя нормы.

У гаспадарках Клецкага раёна былі выяўленыя сур'ёзныя парушэнні ветэрынарна-санітарных нормаў, звязаныя з утылізацыяй трупаў памерлых жывёл. Пра гэта паведаміла мясцовая пракуратура.

Пракурорскія праверкі паказалі, што ў шэрагу сельскагаспадарчых арганізацый не выконваліся правілы пахавання і знішчэння трупаў жывёл і прадуктаў жывёльнага паходжання.

У адным з выпадкаў мёртвую жывёлу і яе рэшткі хавалі не на спецыяльна прызначаным скотомагільніку, а на прылеглай тэрыторыі, якая не была агароджаная. З-за гэтага доступ да тушаў, што раскладаюцца, маглі мець як староннія людзі, так і бадзяжныя і дзікія жывёлы.

Частку трупаў увогуле не закапвалі: яны захоўваліся ў прычэпе і проста на тэрыторыі малачна-таварнага комплексу. Паводле дадзеных пракуратуры, загінулыя жывёлы своечасова не вывозіліся з ферм, а неабходныя ўмовы для іх збору і ўтылізацыі не былі створаныя.

Таксама выяўлены факты ўнясення недакладных звестак у дакументацыю — у журналы рэгістрацыі прыплоду і ацёлаў уносіліся падробленыя даты, у тым ліку ў дачыненні да мёртванароджаных цялят.

У іншай гаспадарцы скотомагільнік не быў належным чынам абсталяваны: адсутнічалі агароджа, крышка з замкамі і навес. Рэшткі тушаў складаліся ў яме і часткова засыпаліся снегам.

Пракуратура падкрэсліла, што такія парушэнні ствараюць пагрозу распаўсюджвання інфекцыйных захворванняў сярод жывёл, асабліва з улікам доступу дзікіх звяроў і птушак да рэштак.

Кіраўніку райвыканкама выставілі патрабаванні ліквідаваць выяўленыя парушэнні, прывесці скотомагільнікі і прылеглыя тэрыторыі ў адпаведнасць з ветэрынарна-санітарнымі нормамі, арганізаваць належныя ўмовы для збору і ўтылізацыі трупаў жывёл, правесці праверку па фактах скажэння дакументацыі і разгледзець пытанне аб прыцягненні вінаватых да адказнасці.