Aston Martin скараціць 20% супрацоўнікаў

• 25.02.2026, 21:28

З-за страт і мытаў Трампа.

Брытанскі вытворца люксавых аўтамабіляў Aston Martin абвясціў пра скарачэнне да 20% ад прыблізна 3 тыс. сваіх супрацоўнікаў у межах новай спробы стабілізаваць фінансавае становішча.

Скарачэнне дазволіць зэканоміць каля £40 млн. У мінулым годзе кампанія скараціла штат на 5%. Прычынамі сталі фінансавыя страты прадпрыемства: па выніках года чыстая страта Aston Martin дасягнула £493 млн, а выручка ўпала на 21%, да £1,26 млрд. Чысты доўг кампаніі на канец года склаў £1,38 млрд.

Паказчыкі ў 2026 годзе застануцца на ўзроўні мінулага года: як мяркуюць у Aston Martin, брэнд зможа прадаць 5,4 тыс. аўтамабіляў.

Генеральны дырэктар Эдрыян Холмарк, які ўзначаліў кампанію ў мінулым годзе, назваў асноўнымі фактарамі падзення паказчыкаў праблемы з якасцю, затрымкі запуску новых мадэляў, запаволенне попыту ў Кітаі і ў значнай ступені мыты, уведзеныя прэзідэнтам ЗША Дональдам Трампам.

У Aston Martin спадзяюцца палепшыць паказчыкі ў 2026 годзе за кошт павелічэння паставак даражэйшага гібрыднага суперкара Valhalla, што павінна павысіць сярэднюю цану продажу, якая ў 2025 годзе знізілася на 15%, да £209 тыс.