Берагавая ахова Кубы застрэліла чатырох пасажыраў амерыканскага катэра

• 25.02.2026, 22:51

Яшчэ шасцёра атрымалі параненні.

Берагавая ахова Кубы застрэліла чатырох пасажыраў хуткаснага катэра, зарэгістраванага ў ЗША, пасля таго як з яго адкрылі агонь па кубінскім персанале. Пра гэта паведаміла пасольства Кубы ў ЗША ў сацсетцы X.

Раніцай 25 лютага катэр выявілі ў тэрытарыяльных водах Кубы. Ён падышоў да берага вострава на адлегласць адной марской мілі, пасля чаго да судна наблізілася падраздзяленне кубінскай памежнай аховы для праверкі. На борце знаходзіліся пяцёра вайскоўцаў. Экіпаж катэра нібыта адкрыў агонь па кубінскіх памежніках, параніўшы камандзіра. Памежная служба адкрыла адказны агонь.

На момант складання дакладу, піша пасольства, чацвёра нападнікаў былі забітыя, яшчэ шасцёра атрымалі параненні, іх эвакуявалі і аказалі медыцынскую дапамогу.

Ведамства паведаміла, што Куба пацвярджае сваю рашучасць абараняць тэрытарыяльныя воды. Працягваецца расследаванне кампетэнтных органаў і ўсталёўваюцца ўсе абставіны таго, што адбылося.