Кубінскія памежнікі расстралялі экіпаж амерыканскага катэра: новыя падрабязнасці
- 26.02.2026, 10:31
З заявай выступіла МУС Кубы.
Сур'ёзны інцыдэнт з ужываннем зброі адбыўся ў тэрытарыяльных водах Кубы, дзе кубінскія памежнікі ўступілі ў бой з экіпажам катэра пад сцягам ЗША, піша The Moscow Times.
Паводле інфармацыі пасольства Кубы ў Злучаных Штатах, судна наблізілася да вострава на небяспечна блізкую адлегласць — прыкладна на адну марскую мілю ад узбярэжжа ў раёне Каё-Фальконес.
Як удакладнілі ў дыпламатычным прадстаўніцтве Кубы, катэр з рэгістрацыяй штата Фларыда рухаўся ў бок востраўнай тэрыторыі, пасля чаго да яго накіраваўся патруль памежнай службы.
Сітуацыя рэзка абвастрылася ў момант збліжэння: паводле дадзеных кубінскага боку, менавіта з амерыканскага катэра першымі адкрылі агонь.
У выніку перастрэлкі быў паранены камандзір кубінскага патрульнага судна, але ў адказ памежнікі таксама ўжылі зброю.
Па выніках сутыкнення, як сцвярджаюць улады Кубы, чацвёра чалавек, якія знаходзіліся на борце амерыканскага катэра, загінулі. Яшчэ шэсць атрымалі раненні рознай ступені цяжкасці.
Пацярпелых эвакуявалі на тэрыторыю Кубы, дзе ім аказалі медыцынскую дапамогу. Пра стан параненых афіцыйна не паведамляецца.
Пазней у МУС Кубы ўдакладнілі, што катэр быў зарэгістраваны ў Фларыдзе. Увесь экіпаж судна складаўся з ураджэнцаў лацінаамерыканскай краіны, якія пражываюць у ЗША. Некаторыя з іх нібыта «маюць судзімасць». Кубінскія ўлады вышуквалі гэтых людзей за датычнасць да арганізацыі, фінансавання або здзяйснення дзеянняў тэрарыстычнага характару на тэрыторыі краіны або за яе межамі. На бягучы момант устаноўлены асобы шасці тых, хто застаўся ў жывых, і аднаго загінулага, звесткі яшчэ пра траіх удакладняюцца. На катэры былі выяўлены штурмавыя вінтоўкі, кароткствольная зброя, самаробныя выбуховыя прыстасаванні (кактэйлі Молатава), бранежылеты, аптычныя прыцэлы і камуфляжная форма. На Кубе таксама затрымалі грамадзяніна Дуніэля Эрнандэса Сантаса, якога накіравалі з ЗША, каб ён прыняў узброеную групу. Супрацоўнікі бяспекі працягваюць расследаванне.
Інцыдэнт адбыўся на фоне абвастрэння адносін паміж Кубай і ЗША, якія заблакіравалі практычна ўсе пастаўкі нафты на востраў, з-за чаго там пачаўся паліўны крызіс. Паводле дадзеных The New York Times, катэр, што ўварваўся ў воды, не належаў берагавой ахове або ваенна-марскім сілам ЗША. Віцэ-прэзідэнт ЗША Джэй-Дзі Вэнс выказаў надзею, што сітуацыя з перастрэлкай ля берагоў Кубы не прывядзе да сур'ёзных наступстваў. Дзяржсакратар ЗША Марка Рубіа, у сваю чаргу, заявіў, што Вашынгтон расследуе стральбу, але пакуль абапіраецца на даныя кубінскага ўрада. Пры гэтым ён падкрэсліў, што інцыдэнт не з'яўляецца аперацыяй амерыканскіх уладаў.