ЕС працягнуў санкцыі супраць рэжыму Лукашэнкі

• 26.02.2026, 18:31

Да 28 лютага 2027 года.

Рада Еўрапейскага саюза ў чацвер, 26 лютага, прыняла рашэнне працягнуць дзеянне санкцый супраць Беларусі яшчэ на адзін год.

Пра гэта паведаміла Міністэрства замежных спраў Літвы.

Такім чынам, санкцыі супраць Беларусі, уведзеныя з-за ўнутраных рэпрэсій, падтрымкі Расіі ў вайне супраць Украіны і гібрыдных атак супраць краін ЕС, застаюцца ў сіле да 28 лютага 2027 года з магчымасцю падаўжэння.

Цяпер пад санкцыямі знаходзяцца 312 грамадзян Беларусі і 57 арганізацый. Іх актывы ў Еўрапейскім саюзе замарожаныя, грамадзянам і кампаніям ЕС забаронена ажыццяўляць з імі фінансавыя аперацыі, а асобам, якія знаходзяцца пад санкцыямі, забаронены ўезд на тэрыторыю блока.

Абмежаванні супраць Мінска накіраваныя на фінансавы, гандлёвы, энергетычны, транспартны і іншыя сектары эканомікі, а таксама на скарачэнне даходаў рэжыму і прадухіленне абыходу санкцый.