Кітаец прысвоіў кашалёк беларуса, але сурова караць яго не сталі

• 26.02.2026, 20:00

Інцыдэнт адбыўся ў лютым на тэрыторыі Нацыянальнага аэрапорта «Мінск».

Жыхар Кітая, які прыляцеў у мінскі аэрапорт, знайшоў кашалёк беларуса з буйнай сумай грошай і забраў яго сабе, аднак замест крымінальнай адказнасці атрымаў толькі штраф, паведамляе «Мінская праўда».

Інцыдэнт адбыўся ў лютым на тэрыторыі Нацыянальнага аэрапорта «Мінск». Мужчына, які прыляцеў у Беларусь з кітайскага Шанхая, заўважыў кашалёк, які хтосьці выпадкова пакінуў, і вырашыў забраць яго сабе. Унутры былі грошы і іншая маёмасць на агульную суму 2948 рублёў.

У ходзе папярэдняга расследавання абвінавачаны цалкам прызнаў сваю віну, вярнуў кашалёк з грашыма і кампенсаваў пацярпеламу маральную шкоду. Суд улічыў ягонае раскаянне і тое, што шкода была кампенсаваная, таму мужчыну прыцягнулі не да крымінальнай, а да адміністрацыйнай адказнасці. У выніку ён заплаціў штраф у памеры 1350 рублёў у даход дзяржавы.

У пракуратуры таксама адзначылі, што сітуацыя адбылася ў тым ліку праз неасцярожнасць пацярпелага: ён выпадкова выраніў кашалёк на стаянцы таксі каля будынка аэрапорта.