РФ вербуе студэнтаў на вайну супраць Украіны
- 26.02.2026, 22:27
Да вербоўкі далучыліся як мінімум 70 расійскіх навучальных устаноў.
Прынамсі 57 ВНУ і 13 устаноў сярэдняй спецыяльнай адукацыі запусцілі кампанію па вербоўцы студэнтаў на вайну супраць Украіны, падлічыла «Эха». Публічная агітацыя вядзецца як мінімум у 23 рэгіёнах Расіі і анэксіяваным Крыме. Лідарам па колькасці навучальных устаноў, што завабліваюць студэнтаў на фронт, стаў родны горад прэзідэнта Уладзіміра Пуціна — Санкт-Пецярбург (19). На другім месцы Масква (13). Пяцёрку замыкаюць Татарстан (6), Новасібірская вобласць (5) і Краснадарскі край (4).
Заключэнне кантракта з Мінабароны падаецца як «галоўны старт у жыцці». Такую фармулёўку, у прыватнасці, выкарыстоўвае Расійскі эканамічны ўніверсітэт (РЭУ) імя Пляханава ў Маскве, прапануючы службу «без адрыву ад вучобы» з пераводам на бюджэт. Санкт-Пецярбургскі дзяржаўны ўніверсітэт (СПбГУ) абяцае добраахвотнікам дадатковую аднаразовую выплату ў 50 тысяч рублёў і магчымасць пасля працягнуць навучанне. ВШЭ гарантуе акадэмічны адпачынак на час службы, а Расійскі тэхналагічны ўніверсітэт (РТУ МІРЭА) абавязваецца закрыць запазычанасці неўпаспяваючых. Адначасова на студэнтаў нярэдка ціснуць: іх абавязваюць наведваць вербавальныя сходы, папярэджваючы пра дысцыплінарныя меры за няяўку, называюць «трусамі» і прымушаюць глядзець фільм пра «здраднікаў» у выпадку адмовы запісвацца на вайну, як у Новасібірскім каледжы транспартных тэхналогій. Навучэнцаў з нізкай паспяховасцю выклікаюць да кіраўніцтва і пагражаюць адлічэннем.
У асноўным набор вядзецца ў нядаўна створаныя войскі беспілотных сістэм. Іх прасоўваюць як «высокатэхналагічныя» і «элітныя». Студэнтаў запэўніваюць, што кантракт можна заключыць на год. Аднак кіраўнік юрыдычнага аддзела «Руху свядомых адмаўленцаў» Арцём Клыга даведаўся, што насамрэч служба будзе бестэрміновай: згодна з указам Пуціна падаўжэнне адбываецца аўтаматычна да заканчэння вайны.
Акрамя таго, з тыпавога дадатку да кантракта высветлілася, што служба ў войсках беспілотных сістэм не гарантаваная, і чалавека могуць накіраваць у пяхоту, бо Мінабароны ўсталёўвае «выпрабавальны тэрмін», падчас якога вызначае прыдатнасць навабранца да дзейнасці, звязанай з БПЛА.
«Падпісанне кантракта для праходжання службы ў войсках беспілотных сістэм юрыдычна нічым не адрозніваецца ад падпісання таго ж кантракта пад ціскам у СІЗА або ў вайсковай частцы. Гарантый вярнуцца жывым, як і гарантый звольніцца па ўласным жаданні, у законе няма», — падкрэслівае Клыга.