Польшча і Арменія ўмацоўваюць ваеннае супрацоўніцтва

• 27.02.2026, 4:12

Краіны падпісалі ваенна-тэхнічнае пагадненне.

Польшча і Арменія ўмацоўваюць ваеннае супрацоўніцтва. Міністэрствы абароны абедзвюх краін падпісалі ў Варшаве ваенна-тэхнічнае пагадненне, якое ахоплівае навуковыя даследаванні, абмен інфармацыяй аб узбраенні і развіццё абаронных прадпрыемстваў.

«Абедзве нашы краіны атрымаюць выгаду ад гэтага супрацоўніцтва», — заявіў прэм’ер-міністр Польшчы Дональд Туск пасля сустрэчы з прэм’ер-міністрам Арменіі Ніколам Пашынянам.

«Мы верым, што ваеннае супрацоўніцтва, супрацоўніцтва ў інтарэсах бяспекі ўсяго рэгіёну, з’яўляецца жыццёва важным інтарэсам як Арменіі, так і Польшчы. Мы добра ведаем, якую высокую цану даводзіцца плаціць, калі застаешся адзін. Абедзве нацыі, абедзве дзяржавы, і мы, як прэм’ер-міністры нашых урадаў, добра разумеем, што трэба рабіць і як гэта рабіць, каб не заставацца ў адзіноце», — сказаў польскі прэм’ер.

Дональд Туск і Нікол Пашынян таксама абмеркавалі двухбаковае супрацоўніцтва, уключаючы гандаль і інвестыцыі, а таксама падтрымку Арменіі з боку ЕС і сітуацыю ў рэгіёне.