У Смаленскай вобласці РФ разліўся аміяк
- 27.02.2026, 12:26
Пасля ўдару Узброеных Сіл Украіны па хімічным заводзе «Дарагабуж».
У Смаленскай вобласці РФ разліўся аміяк пасля ўдару Узброеных Сіл Украіны па хімічным заводзе «Дарагабуж» 25 лютага, распавялі крыніцы Astra ў экстранных службах рэгіёна. Па іх словах, дроны прабілі дзве адтуліны ў цыстэрне для захоўвання вадкага аміяку, унутры якой знаходзілася 1900 тон рэчыва, адбылася ўцечка, піша The Moscow Times.
Следчы камітэт паведамляў, што пры ўдары па заводзе, «ў выніку дэтанацыі выбуховых прыстасаванняў», загінулі сем чалавек, яшчэ 10 пацярпелі. Між тым суразмоўцы выдання адзначылі, што ў спіс ахвяр атакі ўключылі двух выратавальнікаў, якія памерлі ад атручвання аміякам. Таксама ўлады прамаўчалі пра пашкоджанне цыстэрны з гэтым рэчывам.
«Выбухаў было некалькі. Усе пацярпелыя — мае знаёмыя. Горад невялікі, усе адзін аднаго ведаюць. Не хачу я пра гэта гаварыць. Брат працаваў у пажарнай ахове завода», — распавяла сястра аднаго з выратавальнікаў. Крыніцы «Ленты.ру» паведамлялі, што напад прыйшоўся на цэхі аміяку і селітры.
Улады эвакуявалі жыхароў вёскі Пушкарова паблізу «Дарагабужа», аднак у чацвер вярнулі назад, заявіўшы, што праверка паветра «не паказала перавышэнняў» дапушчальнай канцэнтрацыі шкодных рэчываў. Аміяк — таксічны газ удушальнага дзеяння, які выклікае хімічныя апёкі дыхальных шляхоў і можа прывесці да ацёку лёгкіх.
Паводле звестак Astra, пасля атакі Узброеных Сіл Украіны завод спыніў працу. Украінскі маніторынгавы канал Supernova+ пісаў, што дроны цалкам знішчылі галоўную аўтатэрмічную ўстаноўку сінтэзу ў контуры азотнай кіслаты / аміяку — ключавы вузел усёй азотнай хіміі прадпрыемства. Яе аднаўленне можа заняць некалькі месяцаў.
«Дарагабуж» вырабляе мінеральныя ўгнаенні і хімпрадукцыю, у тым ліку аміячную селітру і азотную кіслату, якія выкарыстоўваюцца для стварэння выбуховых рэчываў. Завод належыць групе «Акрон», асноўным уладальнікам якой з'яўляецца мільярдэр Вячаслаў Кантор. На прадпрыемстве, якое выпускае 2,2 млн тон прадукцыі ў год, працуюць больш за 2,8 тысячы чалавек.