Міністр абароны Украіны: Мы падыходзім да балючай кропкі РФ

• 27.02.2026, 13:03

Трэба ціснуць далей.

Расія павялічыла экспарт сырай нафты, каб атрымаць больш грошай і пакрыць дэфіцыт бюджэту з-за вайны. Таму неабходна абмяжоўваць яе нафтаперапрацоўку і ціснуць на «ценявы флот».

Як паведамляе РБК-Украіна, пра гэта міністр абароны Украіны Міхаіл Фёдараў заявіў на сустрэчы з журналістамі, прысвечанай першаму месяцу працы абноўленай каманды Мінабароны.

«Каманда Мінабароны актыўна ўключаецца ў эканамічную вайну. Задача — працаваць над блакаваннем расійскага «ценявага флоту». Узяліся за гэта як за сістэмны праект, дзе ёсць вялікая адказная каманда і экспертыза», — сказаў ён.

Фёдараў адзначыў, што Мінабароны будзе актыўна працаваць над абмежаваннем перапрацоўкі нафты ў РФ і над іншымі важнымі накірункамі.

Міністр дадаў, што ўжо распачата супрацоўніцтва з украінскімі і міжнароднымі інстытутамі, НДА і службамі, каб аб’яднаць іх вакол агульнай мэты.

«Расія з канвеера адразу запускае па нас ракеты. Таму яны павялічылі экспарт сырай нафты — ім патрэбны «кэш». У іх расце дэфіцыт бюджэту. Таму нам трэба ціснуць далей, бо мы падыходзім да балючай кропкі», — падкрэсліў Фёдараў.