Сусветныя пастаўкі смартфонаў скарацяцца на 13% у 2026 годзе

• 27.02.2026, 20:48

Сярэдняя цана смартфона павялічыцца.

Сусветныя пастаўкі смартфонаў могуць скараціцца амаль на 13% да канца 2026 года, вынікае з дакладу International Data Corporation (IDC). Сярэдняя цана смартфона павялічыцца на 14% і дасягне $523. Прычынай росту стане дэфіцыт мікрасхем памяці на рынку.

Глабальныя пастаўкі смартфонаў у 2026 годзе знізяцца на 12,9% у гадавым вылічэнні і складуць каля 1,1 млрд адзінак. Для параўнання, у 2025 годзе аб’ём паставак дасягаў 1,26 млрд прылад. «Мы назіраем не часовае скарачэнне, а цунаміпадобны шок, што зарадзіўся ў ланцужку паставак памяці, з хвалявым эфектам, які распаўсюджваецца па ўсёй індустрыі спажывецкай электронікі», — заявіў прадстаўнік IDC Франсиско Херонимо.

Аналітыкі Counterpoint Research таксама перагледзелі прагноз у бок рэзкага пагаршэння. У кампаніі чакаюць зніжэння сусветных паставак смартфонаў на 12% — самага рэзкага за ўсю гісторыю. Тарун Патак, дырэктар па даследаваннях Counterpoint, патлумачыў, што вытворцы памяці аддаюць прыярытэт пастаўкам для гіперскейлераў (буйных аператараў дата-цэнтраў), а вытворцы смартфонаў вымушаныя «стаяць у чарзе».

Галоўным фактарам дэфіцыту стаў імклівы рост інвестыцый у інфраструктуру штучнага інтэлекту. Тэхналагічныя гіганты паскараюць стварэнне ШІ-інфраструктуры, скупляючы мікрасхемы памяці, што наўпрост штурхае цэны ўверх. Таму рост сабекошту непазбежна прывядзе да павышэння рознічных цэн. Паводле прагнозу IDC, сярэдняя цана смартфона ў 2026 годзе вырасце на 14% — да $523.