У Рагачоўскім раёне кватэру прадалі за 47 рублёў

• 27.02.2026, 21:19

Чаму так танна?

Кватэра ў блакіраваным жылым доме ў аграгарадку Азераны Рагачоўскага раёна аказалася настолькі нікому не патрэбнай, што была прададзеная на аўкцыёне фактычна за базавую велічыню, пра «ўдалыя таргі» паведамляе Дзяржаўны камітэт па маёмасці.

Аб’ект знаходзіўся ў спісе лотаў з 2025 года і прайшоў усе этапы паніжэння цаны. У выніку яго выставілі на таргі па цане, роўнай базавай велічыні.

26 лютага 2026 года адбыўся аўкцыён, на якім пакупнік зрабіў крок у 5%. З улікам гэтага выніковая цана склала 47 рублёў — базавая велічыня плюс крок таргоў.

Падрабязнасцей пра тое, якая гэта кватэра і чаму яна была настолькі незапатрабаваная, Дзяржаўны камітэт па маёмасці не паведамляе.