Супраць мытных пошлін Трампа пададзена больш за дзве тысячы пазоваў

• 28.02.2026, 5:36

Кампаніі патрабуюць вяртання выплачаных імі мытных пошлін за імпарт.

Агульная колькасць пазоваў наконт мытных пошлін прэзідэнта ЗША Дональда Трампа, скасаваных Вярхоўным судам, павялічылася да больш як 2000. Пра гэта паведамляе Bloomberg.

Больш за 100 кампаній, уключаючы FedEx Corp., Dyson Inc., Dollar General Corp., Bausch & Lomb Inc., Brooks Brothers і L’Oreal SA, падалі пазовы супраць адміністрацыі прэзідэнта Трампа, патрабуючы вяртання выплачаных імі мытных пошлін за імпарт. У суме імпарцёры, піша Bloomberg, за дзесяцімесячны перыяд дзеяння тарыфаў заплацілі больш за $170 млрд падаткаў.

«Калі FedEx атрымае кампенсацыю, мы таксама вернем грошы грузаадпраўнікам і спажыўцам, якія першапачаткова панеслі гэтыя выдаткі», — растлумачылі ў лагістычным гіганце FedEx.

Увечары 20 лютага Вярхоўны суд ЗША прызнаў незаконнымі мытныя пошліны, устаноўленыя Трампам на падставе федэральнага закона аб надзвычайных сітуацыях. Суд пастанавіў, што прэзідэнт перавысіў паўнамоцтвы, ужыўшы гэты закон для ўвядзення тарыфаў.