SpaceX падазраюць у таемным продажы акцый інвестарам з Кітая

• 6.02.2026, 8:19

За справу возьмецца Пентагон.

У Сенаце заклікалі Пентагон неадкладна правесці праверку SpaceX праз магчымую куплю доляў кампаніі кітайскімі інвестарамі, што можа ўяўляць пагрозу нацыянальнай бяспецы ЗША.

Пра гэта паведамляе Reuters.

Сенатары-дэмакраты Элізабэт Уорэн і Эндзі Кім у лісце да міністра абароны ЗША Піту Хэгсэту адзначылі, што медыяпаведамленні і судовыя паказанні могуць сведчыць пра непразрыстыя інвестыцыі з Кітая праз афшорныя структуры на Кайманавых і Брытанскіх Віргінскіх астравах, якія нібыта дазволілі кітайскім сродкам трапіць у структуру ўласнасці SpaceX.

Заканадаўцы падкрэслілі, што SpaceX, якую заснаваў Ілон Маск, адыгрывае ключавую ролю ў сферы нацыянальнай бяспекі ЗША: кампанія забяспечвае запуск ваенных і разведвальных спадарожнікаў, а таксама кіруе сеткай Starlink, якой карыстаецца Пентагон (у тым ліку для падтрымкі абароны Украіны). Менавіта таму, на іх думку, любы замежны ўплыў можа паставіць пад пагрозу адчувальныя тэхналогіі і інфармацыю.

Уорэн і Кім патрабуюць, каб Міністэрства абароны ЗША праясніла маштаб патэнцыйнай кітайскай уласнасці ў кампаніі і вызначыла, ці падпадае яна пад правілы ЗША адносна замежнай уласнасці, кантролю або ўплыву (FOCI), і ці павінна праверка замежных інвестыцый быць праведзена Камітэтам па замежных інвестыцыях у ЗША (CFIUS). Яны чакаюць адказу да 20 лютага.

У лісце таксама згадваецца нядаўняе зліццё SpaceX з xAI, што, на думку сенатараў, узмацняе патрэбу ў праверцы, паколькі аб'яднанне тэхналогій штучнага інтэлекту, космасу і камунікацый можа зрабіць кампанію яшчэ больш уразлівай да патэнцыйнага ўплыву з боку замежных інвестараў.

SpaceX пакуль не прадаставіла каментароў адносна запыту аб праверцы.