Навукоўцы назвалі галоўны прадукт для здароўя мозгу

• 6.02.2026, 9:44

Штодня — па 50 грамаў.

Усе гурманы, якія гадамі адмаўлялі сабе ў тлустых малочных прадуктах праз страх перад халестэрынам і лішняй вагой, цяпер нарэшце могуць атрымліваць асалоду ад сыру, масла і слівак. Навукоўцы з Лундскага ўніверсітэта ў Швецыі высветлілі, што ўжыванне тлустага сыру і тлустых слівак істотна зніжае верагоднасць развіцця кагнітыўных парушэнняў у пажылым узросце.

Вынікі сваёй 25‑гадовай працы, што ахапіла больш за 27 тысяч удзельнікаў, даследчая група апублікавала на афіцыйным сайце універсітэта.

Пяць ломцікаў для яснага розуму

Даследчыкі выявілі выразную заканамернасць: людзі, якія штодня з’ядалі 50 грамаў сыру тлустасцю больш за 20%, мелі рызыку развіцця дэмэнцыі, што была на 13% ніжэйшая, у параўнанні з тымі, хто ўжываў менш за 15 грамаў. Калі перавесці гэта ў зразумелыя порцыі, то гаворка ідзе пра прыкладна пяць стандартных слайсаў сыру на дзень, якія могуць стаць смачнай прафілактыкай для здароўя мозгу.

Асабліва ўражваюць даныя пра сасудзістую дэмэнцыю: сярод аматараў тлустага сыру рызыка захварэць на яе была на 29% ніжэйшая. Таксама навукоўцы зафіксавалі станоўчы ўплыў на прафілактыку хваробы Альцгеймера, аднак гэты эфект назіраўся толькі ў пацыентаў, якія не мелі спецыфічнага генетычнага фактару рызыкі (варыянт гена APOE e4).

Сліўкі таксама ў спісе «лекаў»

Нечакана карыснымі аказаліся і тлустыя сліўкі (30–40% тлустасці), якія так часта крытыкуюць дыетолагі. Удзельнікі эксперыменту, якія дадавалі ў свой рацыён 20 грамаў слівак штодня, мелі на 16% ніжэйшую рызыку развіцця дэмэнцыі, чым тыя, хто цалкам выключыў гэты прадукт.

Аўтарка даследавання Эмілі Сонестэдт тлумачыць гэты феномен тым, што ферментаваныя малочныя прадукты, такія як сыр і ёгурт, станоўча ўплываюць на здароўе сасудаў, што наўпрост звязана са здароўем мозгу. У адрозненне ад абястлушчаных аналагаў менавіта паўнавартасныя тлустыя прадукты дэманструюць ахоўны эфект, пацвярджаючы новыя шведскія дыетычныя рэкамендацыі пра карысць штодзённага ўжывання натуральнай «малочкі» прыроднай тлустасці.

Нагадаем, кава можа павышаць ціск, але не заўсёды ўяўляе пагрозу для сэрца. Эксперты растлумачылі, у якіх выпадках напой становіцца небяспечным для людзей з гіпертаніяй.