У Маскве стралялі ў намесніка начальніка ГРУ Мінабароны Расіі

• 6.02.2026, 11:02

Уладзіміра Аляксеева шпіталізавалі.

У Маскве здзейснены замах на генерал-лейтэнанта Уладзіміра Аляксеева, першага намесніка начальніка Галоўнага ўпраўлення Генштаба Узброеных Сіл Расіі (ваенная выведка, вядомая як ГРУ). Пра гэта паведамілі ў Следчым камітэце. Сцвярджаецца, што генерал быў паранены і шпіталізаваны, паведамляе «Радыё Свабода».

Паводле паведамлення, невядомы адкрыў па вайскоўцу агонь у жылым доме на Валакаламскім шасэ на паўночным захадзе Масквы. Невядомы некалькі разоў стрэліў яму ў спіну.

64-гадовы генерал-лейтэнант Уладзімір Аляксееў з 2011 года займае пасаду першага намесніка начальніка Галоўнага ўпраўлення Генштаба — гэта орган ваеннай выведкі.

У 2017 годзе Аляксееў кіраваў ваеннай выведкай у Сірыі, а потым атрымаў званне Героя Расіі.

Падчас мяцяжу Прыгожына ў чэрвені 2023 года Аляксееў звяртаўся да байцоў ПВК «Вагнера» і называў паход на Маскву «памешальствам». Таксама ён удзельнічаў у перамовах Яўгена Прыгожына з намеснікам міністра абароны Юнус-Бекам Еўкуравым у штабе Паўднёвай ваеннай акругі ў Растове-на-Доне.

Аляксееў нарадзіўся ва Украіне — у вёсцы Голодькі Вінніцкай вобласці. У Галоўным упраўленні разведкі Мінабароны Украіны яго абвінавачваюць у разведвальным забеспячэнні агрэсіі супраць Украіны і падрыхтоўцы дадзеных для нанясення ўдараў па ўкраінскай тэрыторыі, у тым ліку па грамадзянскіх аб’ектах.

У выніку замахаў у Расіі ў апошнія гады загінулі некалькі высокапастаўленых вайскоўцаў, аднак, як правіла, гаворка ішла не пра страляніну, а пра выбухі.