Антыпатыя да Трампа ў Еўропе ўзрасла да максімуму

• 6.02.2026, 17:20

Усё больш еўрапейцаў не лічаць ЗША сяброўскай краінай.

Антыпатыя да ЗША ў краінах Заходняй Еўропы значна ўзмацнілася пасля пагрозаў Дональда Трампа у дачыненні да Грэнландыі. Як піша The Guardian, апытанне YouGov, праведзенае ў шасці краінах Еўропы — Даніі, Францыі, Германіі, Італіі, Іспаніі і Вялікабрытаніі — паказала, што спроба прэзідэнта ЗША захапіць Грэнландыю прывяла да таго, што еўрапейцы рашуча настроіліся супраць яго краіны. Меркаванні пра ЗША ўпалі да найніжэйшага ўзроўню з таго часу, як YouGov пачаў іх адсочваць дзесяць гадоў таму.

Паказчыкі вагаюцца ад 62% у Францыі да 84% у Даніі і дэманструюць рэзкі рост негатыўнага ўспрымання ЗША нават у параўнанні з лістападам, калі гэты паказчык складаў ад 49% да 70%.

Апытанне таксама паказала, што ўсё больш еўрапейцаў больш не лічаць ЗША сяброўскай краінай: усё менш рэспандэнтаў ва ўсіх шасці краінах заяўляюць, што па-ранейшаму лічаць іх саюзнікам.

Гэтыя лічбы сведчаць пра рэзкае падзенне ў параўнанні з апошнім апытаннем YouGov, у якім задавалася тое самае пытанне. Так, у Даніі ў ліпені 2023 года 80% апытаных заяўлялі, што лічаць ЗША сябрам або саюзнікам. Цяпер гэты паказчык складае менш за 26%.