Футбольныя зборныя дзяўчат да 17 гадоў з Літвы і Эстоніі адмовіліся гуляць з беларускамі

• 6.02.2026, 18:43

Ім прысудзілі паразу.

У асацыяцыі «Беларуская федэрацыя футбола» (АБФФ) паведамілі пра рашэнне УЕФА пакараць каманды Літвы і Эстоніі паразамі з буйным лікам за адмову гуляць супраць аднагодак з Беларусі.

Федэрацыі футбола Эстоніі і Літвы адмовіліся браць удзел у адборачных матчах чэмпіянату Еўропы сярод дзяўчат да 17 гадоў супраць зборнай Беларусі.

У сувязі з гэтым Кантрольна-этычны і дысцыплінарны орган УЕФА вырашыў залічыць зборным Эстоніі і Літвы тэхнічныя паразы з лікам 0:3. Балтыйскія зборныя адмовіліся гуляць з Беларуссю з-за падтрымкі рэжымам Лукашэнкі вайны ва Украіне.