У Славакіі хочуць датэрміновых выбараў

• 6.02.2026, 23:45

Фіцо пад пагрозай?

У Славакіі пазапарламенцкая партыя «Дэмакраты» сабрала неабходныя 350 тысяч подпісаў для правядзення рэферэндуму аб датэрміновых выбарах і адстаўцы ўрада Роберта Фіцо.

Пра гэта заявіў кіраўнік партыі Яраслаў Надзь, паведамляе РБК-Украіна са спасылкай на Pravda.

Збор подпісаў працягваўся з верасня 2024 года. Акрамя правядзення датэрміновых выбараў, арганізатары рэферэндуму вылучаюць шэраг патрабаванняў:

- аднаўленне Спецыяльнай пракуратуры і Нацыянальнага крымінальнага агенцтва;

- адмена пажыццёвай пенсіі для дзеючага прэм'ера Роберта Фіцо.

«Гэта законны інструмент дэмакратыі. 350 тысяч грамадзян накіравалі ўраду выразны палітычны сігнал, які немагчыма ігнараваць. Людзі расчараваныя, абураныя і стаміліся ад хлусні і хаосу», — падкрэсліў Надзь.

Да канца лютага партыя плануе сабраць яшчэ некалькі тысяч подпісаў «на рэзерв», пасля чаго афіцыйна перадасць іх прэзідэнту Петеру Пелегрыні.

«Людзі сытыя па горла Робертам Фіцо, больш за 70 працэнтаў грамадзян Славакіі надзвычай незадаволеныя ўрадам Роберта Фіцо», — адзначыў Надзь.

Намеснік старшыні партыі Юрай Шэліга выказаў надзею, што прэзідэнт не будзе блакаваць працэс у Канстытуцыйным судзе, а прыслухаецца да волі грамадзян.