Трамп адмяніў 25-працэнтныя пошліны на індыйскія тавары

• 7.02.2026, 8:59

Яны былі ўведзеныя з-за закупак нафты з РФ.

Прэзідэнт ЗША Дональд Трамп адмяніў штрафныя пошліны ў памеры 25% на ўсе індыйскія тавары, якія былі ўведзеныя з-за закупак расійскай нафты.

Пра гэта паведамляе Reuters.

Як паведамляюць у Белым доме, у панядзелак Трамп абвясціў пра гандлёвае пагадненне з Індыяй, якое знізіла амерыканскія тарыфы на індыйскія тавары да 18%. Узамен у Нью-Дэлі пагадзіліся спыніць закупкі расійскай нафты і знізіць гандлёвыя бар'еры.

Reuters нагадвае, што Індыя ў значнай ступені залежыць ад імпарту нафты, пакрываючы каля 90% сваіх патрэб, а імпарт таннай расійскай нафты дапамог знізіць яе выдаткі на імпарт пасля ўварвання Масквы ва Украіну ў 2022 годзе, калі заходнія краіны ўвялі санкцыі на экспарт энергарэсурсаў.

Нядаўна Індыя пачала запавольваць свае закупкі ў Расіі. У студзені яны складалі каля 1,2 мільёна барэляў у дзень і, паводле прагнозаў, знізяцца прыблізна да 1 мільёна барэляў у суткі ў лютым і 800 000 барэляў у суткі ў сакавіку, паводле паведамлення Reuters.