У Расіі з'явілася відэа з тым, хто страляў у генерала ГРУ Аляксеева

• 8.02.2026, 11:19

ФСБ абвінавачвае ў замаху расіян-пенсіянераў.

ФСБ Расіі паведаміла, што змагла ўстанавіць асобы групы людзей пенсійнага ўзросту, якія спланавалі і ажыццявілі замах на жыццё генерала Уладзіміра Аляксеева, намесніка начальніка ГРУ (Галоўнага разведвальнага ўпраўлення) Генштаба Расіі.

ФСБ паведаміла пра затрыманне непасрэднага выканаўцы замаху — грамадзяніна Расіі, 65-гадовага Любаміра Корбы. Паводле заявы расійскай спецслужбы, Корбу затрымалі праваахоўныя органы ААЭ (Аб'яднаных Арабскіх Эміратаў) і перадалі Расіі.

Таксама ў Маскве быў затрыманы «пасобнік» Корбы, расіянін, 66-гадовы Віктар Васін. Яшчэ адна саўдзельніца — таксама грамадзянка Расіі, 55-гадовая Зінаіда Серабрыцкая, — схавалася. У ФСБ настойваюць, што яна «з'ехала ва Украіну». Тым не менш, ФСБ усё яшчэ вядзе пошукі «арганізатараў» замаху, назваўшы трох вышэйзгаданых «выканаўцамі».

Са свайго боку ў СК РФ заявілі, што Корба з'яўляецца ўраджэнцам Цярнопальскай вобласці Украіны, а ў Расію ён «прыбыў у снежні 2025 года па ўказанні спецслужбаў Кіева».

Як паведаміла выданне «Коммерсант», Аляксееў перанёс аперацыю, яго вывелі са стану штучнай комы. Замах на першага намесніка начальніка ГРУ Генштаба быў здзейснены раніцай 6 лютага.