Defense Express: Масква трапіла ў гістарычную пастку
- 8.02.2026, 12:01
Новая ядзерная гонка паміж РФ і ЗША можа адыграць на карысць Украіне.
Прыпыненне дзеяння дагавора СНВ-III паміж Расіяй і ЗША здымае апошнія фармальныя абмежаванні на колькасць ядзерных боегаловак і іх носьбітаў. Нягледзячы на відавочныя рызыкі для глабальнай стабільнасці, для Украіны ў гэтай сітуацыі праглядаюцца пэўныя тактычныя выгоды.
Галоўны плюс для Украіны крыецца ў каласальным кошце ядзернага парытэту. Пра гэта піша партал Defense Express.
Эканамічны ціск
На найбліжэйшае дзесяцігоддзе ЗША заклалі амаль $1 трлн на мадэрнізацыю свайго арсеналу (каля 10% абарончага бюджэту). У РФ выдаткі на «ядзерны шчыт» таксама з'ядаюць велізарную долю бюджэту. Для параўнання, Францыя траціць на свае ядзерныя сілы 14% ваеннага бюджэту. Без абмежаванняў СНВ-III Маскве давядзецца траціць яшчэ больш.
Выгода для Украіны заключаецца ў тым, што кожны рубель, укладзены ў распрацоўку чарговага «Пасейдона» або новай міжкантынентальнай балістычнай ракеты, — гэта рубель, не выдаткаваны на танкі, снарады і жывую сілу, якія непасрэдна пагражаюць Украіне. Акрамя таго, неабмежаваная гонка ўзбраенняў непазбежна б'е па грамадзянскай эканоміцы РФ, узмацняючы ўнутранае напружанне.
Гістарычная пастка
Эксперты бачаць у тым, што адбываецца, паўтарэнне сцэнару Халоднай вайны, які прывёў да краху СССР. ЗША могуць свядома ўцягваць Маскву ў гонку ўзбраенняў, якую тая эканамічна не пацягне.
Пентагон ужо працуе над праграмай ПРА Golden Dome, таксама ў Штатах абмяркоўваюць павелічэнне ваеннага бюджэту да $1,5 трлн, што зробіць фінансавую розніцу паміж Вашынгтонам і Масквой непераадольнай.
Эксперты ўпэўненыя, што шанцы на падпісанне новай дамовы практычна роўныя нулю з-за супярэчнасцяў бакоў. У прыватнасці, ЗША патрабуюць удзелу Кітая, а РФ, са свайго боку, хоча абмежаваць арсеналы Францыі і Вялікабрытаніі.
У перспектыве гэта можа ўцягнуць у спрэчку Індыю, Пакістан, КНДР і Ізраіль, робячы любы кантроль над узбраеннямі немагчымым. У гэтай сітуацыі для Украіны ядзерная гонка фактычна з'яўляецца «другім фронтам», які знясільвае расійскую ваенную машыну знутры, прымушаючы Крэмль выбіраць паміж стратэгічнымі амбіцыямі і рэальнымі баявымі дзеяннямі на зямлі.