Як дарослыя адраджаюць індустрыю цацак

• 8.02.2026, 16:21

Гэтае захапленне не мае ўзросту.

На выставе цацак у Нюрнбергу, якой у мінулым месяцы споўнілася 75 гадоў, увагу прыцягвалі не толькі дзеці. Усё больш дарослых праяўляе цікавасць да цацак. Хтосьці з радасцю назірае за гонкамі мініяцюрных аўтамабіляў, хтосьці трымае фігурку персанажа з серыяла «Вельмі дзіўныя справы», піша The Economist (пераклад — сайт Charter97.org).

Паводле дадзеных аналітыка Фрэдэрыка Тютта з кампаніі Circana, продажы цацак у свеце павялічыліся на 7% летась шмат у чым дзякуючы дарослым пакупнікам — так званым «кідалтам». Дзесяць гадоў таму толькі 9% выдаткаў на цацкі ў пяці найбуйнейшых еўрапейскіх краінах прыпадала на людзей старэйшых за 18 гадоў, а да мінулага года гэтая доля больш чым падвоілася.

Вытворцы цацак задаволены — дарослыя, асабліва бездзетныя, маюць большы даход, чым дзеці, і ахвотна трацяць яго на сябе. Дарослыя купляюць цацкі не толькі да святаў, а цягам усяго года. Спецыяльныя калекцыі і абмежаваныя серыі стымулююць попыт. Mattel выпусціла разам з Gucci і Формулай-1 цацачныя машынкі Hot Wheels, а вытворца папулярных лялек Labubu, Pop Mart, прадае «загадкавыя скрынкі», ператвараючы кожную куплю ў азартнае забаўленне.

Эксперты адзначаюць, што любоў да цацак у дарослых не з'яўляецца ўцёкамі ад рэальнасці. Як лічыць даследчыца гульнявых патэрнаў дарослых Катрііна Хельякка з фінскіх універсітэтаў Тампэрэ і Турку, дарослыя, што купляюць цацкі, «не вяртаюцца ў дзяцінства, а перавызначаюць дарослае жыццё». Патрэба ў «здзіўленні і захапленні» захоўваецца на працягу ўсяго жыцця.

З ростам цікавасці дарослых да цацак індустрыя атрымлівае новы рынак і ўпэўнена адаптуе маркетынг да дарослай аўдыторыі, робячы гульню часткай паўнавартаснага дарослага жыцця.