Канар Макгрэгар: Беларус Арлоўскі – герой!

• 8.02.2026, 19:12

Вядомы ірландскі баец у захапленні ад беларускага атлета.

Заваяваўшы ў супрацьстаянні з Бэнам Ротвелам чэмпіёнскі паяс BKFC у цяжкай вазе, Андрэй Арлоўскі звярнуўся да людзей, якія цяпер змагаюцца з ракам.

«Хлопцы, тыя, хто цяпер вядзе бой з ракам, – не здавайцеся, чорт вазьмі. Я — выдатны прыклад. Тройчы перамог рак. Працягвайце змагацца. Жыццё цудоўнае», – сказаў Арлоўскі ў інтэрв’ю пасля бою.

Натхнёны чарговай перамогай былога чэмпіёна UFC, саўладальнік лігі BKFC Канар Макгрэгар аддаў належнае 47-гадоваму беларускаму атлету.

«Андрэй Арлоўскі – герой! Менавіта дзякуючы яму беларускі сцяг з’явіўся на паясе UFC. Тройчы перамог рак і цяпер з’яўляецца дзеючым чэмпіёнам BKFC у цяжкай вазе», – напісаў ірландец у сацыяльнай сетцы.

Тытульны бой у цяжкай вазе паміж Ротвелам і Арлоўскім, які ўзначаліў турнір KnuckleMania 6 у Філадэльфіі, завяршыўся ў трэцім раўндзе пасля таго, як лекар парэкамендаваў рэферы спыніць паядынак з-за сур’ёзных рассячэнняў на галаве і твары амерыканца.