Беларуска, якая ўжо больш за 50 гадоў у шлюбе, дала параду дзяўчатам, як выбраць падыходнага жаніха

• 8.02.2026, 20:03

І падзялілася сакрэтам, як жыць з ім доўга і шчасліва.

Нядаўна сям'я Яхноўцаў з вёскі Атвержычы Столінскага раёна адзначыла 50 гадоў сумеснага жыцця. Пра тое, як выбраць жаніха, каб з ім жыць доўга і шчасліва, жанчына з вялікім досведам распавяла выданню «Навіны Палесся».

Мікалай Адамавіч і Святлана Яфімаўна родам з вёскі Атвержычы, таму ведалі адзін аднаго з дзяцінства. Да вяселля маладыя людзі сустракаліся ўсяго каля трох месяцаў, а пасля роспісу засталіся жыць у вёсцы. У пары чацвёра дзяцей: трое сыноў і дачка. Муж 40 гадоў адпрацаваў экспедытарам у мясцовым філіяле «Общепит», а жонка больш за 30 гадоў — кухаркай у школьнай сталоўцы. Паралельна трымалі падсобную гаспадарку, апрацоўвалі агарод, зямлю ў полі.

Разважаючы пра сакрэты доўгага шлюбу, сужэнцы найперш называюць павагу і цярпенне.

— Гэта цяпер маладыя людзі, варта толькі што-небудзь пайсці не так, адразу разбягаюцца, — кажуць Яхноўцы. — Наша пакаленне іншае: дзесьці ўступіць, дзесьці прамаўчаць. Нас так вучылі нашы бацькі. Без гэтых, па сутнасці, простых рэчаў нельга пабудаваць ўдалы шлюб. У цэлым, не варта дапускаць недагаворак, трэба размаўляць, абмяркоўваць і паўсядзённыя справы, і праблемы. Калі ёсць узаемаразуменне і згода, усе задачы можна вырашыць.

Акрамя таго, Святлана Яфімаўна дала параду дзяўчатам, якія стаяць на парозе сямейнага жыцця.

— У мужы трэба выбіраць чалавека надзейнага і ўважлівага, — параіла яна. — Памылкова думаць, што сямейнае жыццё — гэта пастаяннае свята. Хутчэй, гэта штодзённая праца, часам непрыкметная і незаўважная.