Беларус праз гады выпадкова даведаўся пра дачку і знайшоў яе

• 9.02.2026, 11:54

Лёсавызначальная гісторыя, якая расцягнулася на дзесяцігоддзі.

Пачатак гэтай кінашнай гісторыі быў закладзены яшчэ ў савецкія часы, калі хлопца з Брэста пасля заканчэння вучобы размеркавалі на Далёкі Усход. З цягам часу ён набыў там сяброў, сустрэў дзяўчыну. Пасля заканчэння адпрацоўкі хлопец вярнуўся ў Брэст без дзяўчыны: тая адмовілася ехаць з ім з-за хворай маці. Толькі праз гады ён выпадкова даведаўся, што ў яго ёсць дачка, піша БЕЛТА.

Пасля ад’езду сувязь паміж закаханымі яшчэ нейкі час падтрымлівалася перапіскай, але потым абарвалася.

Праз многія гады мужчына выпадкова сустрэўся са знаёмым, з якім разам працаваў на Далёкім Усходзе. У размовах пра мінулае брэстчанін даведаўся, што былая дзяўчына праз некалькі месяцаў пасля яго ад’езду нарадзіла дачку. Мужчына запаліўся надзеяй, што гэта яго дзіця. Пацвердзіць гэтыя здагадкі ўжо не было каму, бо былая каханая памерла.

Дачку ўдалося адшукаць праз знаёмых. Калі яны звязаліся па тэлефоне, дзяўчына расказала, што яе маці так і не выйшла замуж, хто яе бацька, не казала. На той момант мужчына ўжо быў пенсіянерам, сям’і і дзяцей не меў.

«Ён прапанаваў дзяўчыне прыехаць у Брэст для правядзення генетычнай экспертызы. Яна пераадолела тысячы кіламетраў. Людзі ўпершыню бачылі адзін аднаго, але ім хацелася стаць роднымі. Мы самі з затаеным дыханнем чакалі вынікаў, трымалі за іх кулакі. Бацькоўства пацвердзілася», — расказала эксперт-генетык упраўлення ДКСЭ па Брэсцкай вобласці Таццяна Кліза.

За мінулы год эксперты Брэсцкай вобласці правялі каля 1,1 тыс. генетычных экспертыз. За гэтымі лічбамі — раскрытыя злачынствы, адноўленыя імёны зніклых без вестак людзей, экспертызы па ўстанаўленні факта бацькоўства.