Беларуска прынесла ў абменнік $50, якія прывезла з Іспаніі

• 9.02.2026, 15:11

Супрацоўніца банка націснула трывожную кнопку.

Падробленую купюру наміналам у 50 долараў прынесла ў абменны пункт жыхарка Баранавіч, паведамілі ў прэс-службе МУС.

30-гадовая жанчына прыйшла ў банк і падала супрацоўніцы фінустановы банкноту. Купюра выклікала сумненні ў касіра, і супрацоўніца «націснула трывожную кнопку». Прыбылыя на месца аператыўнікі вылучылі грашовы знак і накіравалі яго на экспертызу.

Спецыялісты пацвердзілі: купюра ў 50 долараў — падробленая.

«Высветлілася, што грашовы знак жанчына атрымала, знаходзячыся на адпачынку ў Іспаніі. Пра тое, што грошы фальшывыя, яна не ведала», — паведамілі ў МУС.

Крымінальную справу за выкарыстанне падробкі ўзбудзілі ў дачыненні да неўстаноўленай асобы.