У Польшчы адкрылі першы ў свеце «птакамат»

• 9.02.2026, 22:43

Для дапамогі птушкам.

У Варшаўскім заапарку ў лютым адкрылі Ptasi Punkt Przyjęć (ptakomat) — пункт прыёму параненых птушак, — піша партал The Warsaw.

Ён працуе кругласутачна. Туды людзі могуць прыносіць птушак, якім патрэбна дапамога. Такая пляцоўка дазволіць хутчэй дапамагчы птушкам у надзвычайных сітуацыях.

«Гаворка ідзе не пра звычайны аб’ект, а пра першае месца, куды жыхары змогуць звярнуцца, заўважыўшы птушку, што мае патрэбу ў дапамозе, і адразу звязацца з супрацоўнікамі Птушынага прытулку. Пункт будзе працаваць кругласутачна, сем дзён на тыдзень», — падкрэслілі каардынатары праграмы «Зялёная Варшава».

Пункт прыёму параненых птушак — павільён, спраектаваны так, каб перадача птушак была бяспечнай. Ён працуе па двухбаковай сістэме.

«У павільёне размешчаны боксы для птушак розных відаў і памераў — ад сініц да буслоў. Аб’ект падзелены на дзве часткі: людзі, што прыносяць птушак, якім патрэбна дапамога, змяшчаюць іх у адпаведны бокс, а супрацоўнікі прытулку забіраюць іх з другога боку, прызначанага выключна для персаналу», — патлумачыла кіраўніца прытулку Анжэліка Гацкоўская.

Будынак абсталяваны наступнымі сістэмамі: ацяплення, вентыляцыі, кандыцыянавання, сантэхнікі і відэаназірання.

Перадаць птушак супрацоўнікам прытулку проста. На ўваходзе ў заапарк трэба сказаць ахове, навошта прыйшлі, і паказаць скрынку з птушкай. Потым яе варта пакінуць у вольнай ячэйцы. Запоўненую картку неабходна пакласці на скрынку або апусціць у прызначаную для гэтага ўрну, размешчаную каля ўваходных дзвярэй.

Напрыканцы трэба пераканацца, што дзверцы ячэйкі шчыльна зачыненыя. Нельга адкрываць занятыя ячэйкі. Таксама забараняецца стукаць па дзверцах і пакідаць у ячэйках ежу або староннія прадметы.