У Беларусі забаранілі яшчэ тры расійскія БАДы

• 1.03.2026, 18:06

Тэрмінова праверце свае аптэчкі.

У Беларусі забаранілі ўвоз, захоўванне і продаж яшчэ трох біялагічна актыўных дабавак (БАДаў) да ежы расійскай вытворчасці. Пра гэта паведамілі у Рэспубліканскім цэнтры гігіены, эпідэміялогіі і грамадскага здароўя. Гаворка пра прадукцыю кампаніі ТАА «Сапплемент Групп».

У спіс забароненых адныне ўнесены:

«Vitamin A (Вітамін A)»;

«Methyl B12 (Метылкобаламін B12)»;

«Folic acid (Фаліевая кіслата)».

Спецыялісты ўстанавілі, што ў капсулах гэтых БАДаў перавышаная дапушчальная сутачная доза актыўных рэчываў. Менавіта гэта стала падставай для ўвядзення часовых санітарных мер.

Паводле даных спецыялістаў, празмерны прыём вітамінаў A і B12 можа выклікаць непрыемныя сімптомы — галавакружэнне, млоснасць, скурныя рэакцыі.

Асобная ўвага — фаліевай кіслаце. Яна неабходная для правільнага развіцця плоду, асабліва ў першым трыместры цяжарнасці. Аднак празмерны прыём можа быць небяспечны для будучага дзіцяці.