Да Беларусі рухаецца халодны фронт цыклону

• 1.03.2026, 21:46

Якое надвор'е ён прынясе?

Да заходніх межаў Беларусі падышоў, як бачна са спадарожніка, расплыўчаты халодны фронт цыклону, цэнтр якога «Н» цяпер над Фінляндыяй. Фронт цягам ночы працягне рухацца на ўсход, у глыб нашай краіны, аднак, акрамя павелічэння воблачнасці, нічога з сабой не прынясе.

За фронтам на нашу тэрыторыю пачне паступаць крыху больш прахалоднае паветра з р-на Балтыйскага мора. Заўтра па-ранейшаму цёпла, але на два–чатыры градусы будзе халадней. Максімальныя тэмпературы ўдзень: на поўначы +2..+5°, у цэнтры +6..+8°, на поўдні да +10°.

Да вечара паўночна-ўсходняя частка Беларусі апынецца ў тылавай частцы вышэйзгаданага цыклону «Н», які да гэтага часу перамесціцца ў р-н Ніжняга Ноўгарада, РФ. Тут увечары і ў ноч на аўторак магчымыя ападкі ў выглядзе мокрага снегу пры тэмпературы -1..+1°.