Мінчанін падарыў бацьку кватэру і гараж, але да здзелкі ўзніклі пытанні

• 10.03.2026, 11:12

У выніку яе скасавалі.

Мінчанін падарыў свайму бацьку кватэру і гараж. У пракуратуры дапусцілі, што такім чынам жыхар сталіцы спрабаваў пазбегнуць накладання спагнання па падатковых абавязацельствах і запатрабавалі скасаваць здзелку.

Былы ўладальнік аб’ектаў нерухомасці меў запазычанасць у 80 тысяч рублёў па падаходным падатку і пені па ім. Кватэру і гараж мужчына падарыў бацьку, калі пытаннем спагнання запазычанасці ўжо заняліся судовыя выканаўцы. Гэты факт наштурхнуў пракурораў на думку, што шчодрасць мінчаніна мае карыслівы матыў.

«У ходзе праверкі бацька даўжніка патлумачыў, што гаражам і кватэрай ён не карыстаецца, выдаткі на ўтрыманне нерухомай маёмасці нясе сын. Кватэра і гараж былі падораны яму сынам нібыта ў залік вяртання ўзніклага паміж блізкімі сваякамі доўгу, наяўнасць якога апытаны не змог даказаць», — паведамілі ў наглядным ведамстве.

Пракуратура прыйшла да высновы, што дагаворы дарэння былі заключаны сынам і бацькам толькі для выгляду. Такім чынам мінчанін планаваў пазбегнуць магчымых праблем, якія маглі ўзнікнуць з аб’ектамі нерухомасці з-за назапашанай запазычанасці.

У выніку суд скасаваў дагаворы дарэння. На этапе разгляду грамадзянскай справы даўжнік выплаціў усю суму падаходнага падатку і пені.