Вядомая электронная плацёжная сістэма заблакавала беларусаў

• 10.03.2026, 11:39

У многіх на рахунках заблакаваныя грошы.

Электронная плацёжная сістэма Skrill пачала блакаваць уліковыя запісы беларусаў.

Карыстальнікі з Беларусі атрымліваюць паведамленні, у якіх сказана, што «санкцыйныя абмежаванні ўплываюць на магчымасць прадастаўляць паслугі ў вашай краіне», піша (Office Lifehttps://officelife.media/news/70254-skrill-nachal-blokirovat-akkaunty-belorusov/) са спасылкай на чытачоў.

Прыкметна, што паведамленні пра закрыццё ўліковых запісаў прыходзяць у той жа дзень, калі да іх ужо нельга атрымаць доступ і, у выніку, вывесці грошы.

«Гэтае рашэнне звязанае з нашымі нарматыўнымі і санкцыйнымі абмежаваннямі. Яно не звязанае з вашай асабістай дзейнасцю», — гаворыцца ў такіх паведамленнях.

З пачатку сакавіка падобныя паведамленні пачалі атрымліваць і расійскія карыстальнікі. Як пішуць у тэматычных чатах, блакуюць усе ўліковыя запісы, якія былі зарэгістраваныя на пашпарт Беларусі або Расіі, калі гэтыя дзяржавы пазначаны і як краіна пражывання. Пры гэтым удакладняецца, што вывесці грошы з заблакаванага ўліковага запісу магчыма толькі банкаўскім пераводам на рахунак, адкрыты на імя ўладальніка гэтага ўліковага запісу. Але ёсць нюанс: беларускія і расійскія банкі для такіх мэтаў не падыдуць зноў-такі з-за санкцый.

Skrill — электронная плацёжная сістэма, заснаваная ў Лондане. З 2022 года яна працавала для беларусаў з абмежаваннямі, у тым ліку нельга было зарэгістраваць новы ўліковы запіс.