Найбуйнейшы банк Індыі адмовіўся праводзіць плацяжы за расійскую нафту

• 10.03.2026, 13:25

Нягледзячы на паблажкі ад Трампа.

Адміністрацыя Дональда Трампа выдала Індыі часовы дазвол на закупкі расійскай нафты ў сувязі з крызісам, выкліканым спыненнем экспарту з краін Персідскага заліва. Але не факт, што расійскія пастаўшчыкі змогуць лёгка атрымаць грошы за сваю нафту. State Bank of India (SBI), найбуйнейшы ў краіне па памеры актываў, не гатовы апрацоўваць плацяжы за яе, паколькі не ўпэўнены, як доўга будзе дзейнічаць прадастаўленая Вашынгтонам паблажка, піша The Moscow Times.

Кіраўніцтва дзяржбанка лічыць, што ўдзел у такіх аперацыях можа падвергнуць яго рызыкам, улічваючы буйны міжнародны бізнес SBI, а таксама нанесці шкоду рэпутацыі, расказалі Bloomberg людзі, знаёмыя з сітуацыяй. Па іх словах, SBI спыніў абслугоўванне любых здзелак з расійскай нафтай пасля таго, як Злучаныя Штаты напрыканцы кастрычніка ўвялі санкцыі супраць «Раснафты» і «Лукойла».

ЗША, якія таксама дамовіліся з Індыяй аб спыненні яе закупак расійскай нафты, на мінулым тыдні дазволілі аднавіць імпарт на месяц з-за крызісу, справакаванага атакамі на Іран. Міністр фінансаў ЗША Скот Бэсент падкрэсліў, што Індыя можа купляць толькі тую сыравіну, якая ўжо была вывезеная з Расіі і захоўваецца ў танкерах. Падчас тэлеканферэнцыі ў панядзелак міністраў фінансаў краін «вялікай сямёркі» ЗША «падкрэслівалі», што рашэнне па Індыі «вельмі абмежаванае як па часе, так і па маштабах мер», расказаў еўракамісар па эканоміцы Валдзіс Дамброўскіс.

Ён дадаў на прэс-канферэнцыі пасля тэлеразмовы міністраў: «Яны [ЗША] не чакаюць, што гэта істотна паўплывае на даходы Расіі ад продажу нафты».

Хаця SBI адмаўляецца афармляць плацяжы за расійскую нафту, некаторыя банкі Індыі напрыканцы мінулага года былі гатовыя разгледзець магчымасць іх правядзення — пры ўмове, што нафту будуць пастаўляць расійскія кампаніі, не ўключаныя ў чорныя спісы, і ўсе санкцыі будуць выконвацца, казалі раней крыніцы Bloomberg.