Трамп правёў апытанне адносна свайго «пераемніка»

• 10.03.2026, 14:17

Каго выбралі донары паміж Рубіо і Вэнсам?

Дональд Трамп правёў неафіцыйнае апытанне сярод донароў пра тое, каго яны бачаць наступным кандыдатам на выбарах прэзідэнта ЗША, якія адбудуцца ў 2028 годзе. Пра гэта піша NBC News.

Выданне паведамляе, што сярод прысутных большасць падтрымалі кандыдатуру дзяржаўнага сакратара Марка Рубіо, а не віцэ-прэзідэнта Джэя Дзі Вэнса. Журналісты адзначаюць, што гэта можа сведчыць пра рост уплыву Рубіо дзякуючы яго цэнтральнай ролі ў знешняй палітыцы адміністрацыі.

У той жа час, як адзначае выданне, выбарцы-рэспубліканцы працягваюць аддаваць перавагу Вэнсу. Ён, у прыватнасці, мае большую падтрымку сярод прыхільнікаў руху MAGA, хоць апошнім часам яго публічная дзейнасць змяншылася праз пратаколы бяспекі. Затое Рубіо Трамп усё часцей публічна хваліць, называючы яго «найлепшым дзяржаўным сакратаром у гісторыі». Гэта стварае канкурэнтную дынаміку ўнутры каманды.

Таксама на пазіцыі абодвух кандыдатаў паўплывала вайна ў Іране. Рубіо раскрытыкавалі за здагадку пра тое, што Вашынгтон пачаў баявыя дзеянні па просьбе Ізраіля. У той час як Джэй Дзі Вэнс вымушаны балансаваць паміж сваёй рэпутацыяй праціўніка знешніх умяшанняў і неабходнасцю падтрымліваць загады прэзідэнта.