Адключэнне інтэрнэту паралізавала бізнес у цэнтры Масквы
- 10.03.2026, 15:30
«Усё зламалася».
У межах Садовага кальца ў Маскве пяты дзень назіраюцца перабоі з інтэрнэтам, а часам і з сотавай сувяззю, распавядаюць тыя, хто жыве і працуе ў цэнтры сталіцы. Гэта звязана з тым, што Міністэрства лічбавага развіцця Расіі тэстуе магчымасць блакіроўкі сайтаў, не ўключаных у «белы спіс», піша The Moscow Times.
«Усё зламалася», — каментуе гэта жыхар Замаскварэчча, у якога з 6 сакавіка дома няма ні мабільнага, ні праваднога інтэрнэту — у тым ліку пры спробе зайсці на сайты са спісу. «Білайн» 6 сакавіка папярэдзіў пра магчымыя перабоі ў працы сеткі ў Маскве з-за «вонкавых абмежаванняў». Пра тое ж 8 сакавіка паведаміў аператар гарачай лініі МТС.
«З 6 сакавіка няма не тое што мабільнага інтэрнэту ў “вялікай тройкі”, дык яшчэ і мабільнай сувязі не было. Выхадзіш з дому — і атрымліваеш поўны лічбавы дэтокс», — распавядае жыхарка дома каля Чыстых Прудаў. У паслясвяточны працоўны аўторак магчымасць прымаць званкі з’явілася, але СМС не прыходзяць, у інтэрнэце не адкрываюцца нават сайты з «белага спісу», распавядае масквічка.
«Так і жывём — перабежкамі ад вай-фаю да вай-фаю», — скардзіцца на тыя ж праблемы жыхар Кітай-города. Паход па пакупкі ў гэтыя дні ператварыўся ў латарэю, дзеліцца ён: «Калі ў цябе няма наяўных, то пытанне — ці прададуць табе хоць што-небудзь, бо ў многіх касы былі настроены на мабільную перадачу даных».
У аўторак інтэрнэт з’явіўся каля некаторых станцый метро. «Наогул увесь цэнтр нібыта «ў дзірках»: выйшаў з дому — і не ведаеш, будзеш на сувязі ці не», — кажа масквіч.
У выхадныя крамы «Дзіксі» ў цэнтральных раёнах гандлявалі толькі за наяўныя, але частку тавараў, напрыклад безалкагольныя напоі, малочныя прадукты, корм для жывёл, усё роўна нельга было набыць: яны проста не прабіваліся на касах. Праверка «Честного знака» на такіх таварах наладжаная праз мабільны інтэрнэт, таму праблемы ўзніклі ва ўсіх раёнах, дзе абмежаваны інтэрнэт, тлумачылі прадаўцы.
Супрацоўнікі кафэ і рэстаранаў унутры Бульварнага кальца таксама кажуць пра праблемы — узнікаюць складанасці з тэрміналамі пры аплаце, кліенты не могуць патэлефанаваць і напісаць пра заказ столікаў, не пералічваюць чайавыя: «А ад наяўных многія адвыклі».
У Таганскім раёне тэлефанаваць з мабільнага можна, але інтэрнэту няма ніякага — ні мабільнага, ні праваднога, распавядае ўладальнік невялікага аўтасэрвісу непадалёк ад Садовага кальца. Гэта стварыла яго бізнесу праблемы: у яго працавала анлайн-запіс і заказ запчастак праз сайт, а ён сам тры дні не мог атрымаць доступ да свайго сайта. «Як і ўсім калегам, давялося шаманіць: высветлілася, напрыклад, што калі адключыць у наладах прылады 4G, то на 3G інтэрнэт часам як-небудзь жыве», — кажа прадпрымальнік.
Як заўсёды, пры праблемах з мабільным інтэрнэтам расце колькасць заявак на падключэнне па валакне, кажа супрацоўнік правайдара, які працуе ў цэнтры Масквы. Па яго ацэнцы, асабіста ў яго колькасць выкананых заказаў на падключэнне з 6 па 10 сакавіка ўзляцела ўтрая. Гандлёвыя кропкі, салоны прыгажосці, крамы, рэстараны цяпер занепакоіліся якасцю сваіх падключэнняў да стацыянарнага інтэрнэту, дадае ён. «Без інтэрнэту «з разеткі» цяпер ніяк, прычым яго павінна хапаць не толькі нам, але і нашым кліентам», — кажа кіраўніца салона эпіляцыі ў раёне Беларускай.
«Правалы» са сувяззю ўзнікаюць не толькі ў цэнтры. У нядзелю знікала сувязь у Капцёве (поўнач Масквы), паступаюць паведамленні пра збоі каля ВДНХ, у Лефортаве і на Бауманскай.
Прэс-сакратар Пуціна Дзмітрый Пяскоў заявіў толькі, што «ўсе адключэнні і абмежаванні сувязі» адбываюцца паводле закона і звязаныя з забеспячэннем бяспекі, а што да праблем, якія гэта стварае для бізнесу, то ўлады вывучаць сітуацыю і прапануюць нейкае рашэнне.