«Лятаючыя аўтамабілі» пачнуць палёты ў ЗША ўжо летам 2026 года

• 10.03.2026, 16:28

Урад ЗША абвясціў пра новую пілотную праграму.

Новыя тыпы лятальных апаратаў, свайго кшталту «лятаючыя аўтамабілі», здольныя ўзлятаць і прызямляцца ў абмежаванай прасторы, як верталёты, але функцыянуюць як самалёты, пачнуць працаваць у ЗША ўжо ў чэрвені 2026 года. Пра гэта паведаміла Міністэрства транспарту ЗША, піша WIRED.

«Лятаючыя аўтамабілі» з'явяцца ў паветранай прасторы васьмі рэгіёнаў ЗША, уключаючы горад Нью-Ёрк. Міністэрства транспарту ЗША абвясціла пра пачатак трохгадовай пілотнай праграмы, у межах якой новыя лятальныя апараты будуць перавозіць людзей і грузы па краіне яшчэ да таго, як яны атрымаюць поўную сертыфікацыю ад Федэральнага ўпраўлення грамадзянскай авіяцыі.

Кампаніі, што распрацоўваюць гэтыя лятальныя апараты, сцвярджаюць, што яны таннейшыя, цішэйшыя і выкідваюць менш шкодных рэчываў у паветра, чым верталёты або самалёты. У новым праекце возьмуць удзел электрычныя лятальныя апараты з вертыкальным узлётам і пасадкай (eVTOL) і лятальныя апараты з кароткім узлётам і пасадкай (STOL). Яны патрабуюць мала месца для эксплуатацыі і могуць здзяйсняць узлёт і пасадку па-за межамі традыцыйных аэрапортаў і бліжэй да месцаў пражывання і працы людзей. Распрацоўшчыкі гэтых транспартных сродкаў лічаць, што ў бліжэйшай будучыні звычайныя людзі змогуць перамяшчацца паміж суседнімі гарадамі за лічаныя хвіліны.