Украінскія памежнікі збілі расійскі «Шахед» з дапамогай стралковай зброі

• 10.03.2026, 17:45

Звышвысокая дакладнасць стральбы.

Вайскоўцы 6-га памежнага Валынскага атрада Дзяржаўнай памежнай службы Украіны ліквідавалі ўдарны дрон тыпу «Шахед» з дапамогай стралковай зброі, паведамляе МУС Украіны.

Варожы БПЛА-камікадзэ быў своечасова заўважаны нарадам падчас спробы перасекчы паветраную прастору на паўночным участку мяжы.

Памежнікі адкрылі шчыльны агонь са стралковай зброі па рухомай мэце. У выніку дакладных стрэлаў дрон быў збіты ў паветры. «Шахед» выбухнуў і ўпаў, не паспеўшы дасягнуць запланаванай мэты. Пацярпелых сярод асабовага складу і разбурэнняў грамадзянскай інфраструктуры ўдалося пазбегнуць.