Беларускія прадпрыемствы працягваюць не плаціць за спажываную энергію

• 10.03.2026, 18:09

Ім пагражаюць абмежаваць падачу газу.

У Беларусі працягвае працу рэспубліканская камісія па кантролі за ажыццяўленнем разлікаў за прыродны газ, электрычную і цеплавую энергію. З пратаколу пасяджэння ад 23 лютага бачна, што беларускія прамысловыя гіганты працягваюць не плаціць за энергію. Даўгі за 2025 год пераносяцца на 2026-ы.

Так, большасць шклазаводаў Беларусі, МТЗ, Мінскі падшыпнікавы завод, «Світанак», цэментныя заводы, БМЗ, «Гомсельмаш» і многія іншыя не пагасілі запазычанасць за мінулы год.

Іх плацяжы за энергію перайшлі на 2026-ы. На канец лютага спрабуюць дамагчыся ад прадпрыемстваў хаця б 50% аплаты за спажыванне ў бягучым годзе.

У якасці пакарання камісія пагражае даўжнікам абмежаваць падачу прыроднага газу на 25%.

Дакумент у распараджэнне рэдакцыі «Еўрарадыё» перадала ініцыятыва BELPOL.