ЗША паспяхова суправадзілі танкер праз Армузскі праліў

• 10.03.2026, 20:36

Вашынгтон мае намер забяспечыць бяспечнае паступленне нафты на сусветныя рынкі.

Ваенна-марскія сілы ЗША паспяхова суправадзілі нафтавы танкер праз Армузскі праліў, заявіў міністр энергетыкі Крыс Райт. Мэта — «забяспечыць паступленне нафты на сусветныя рынкі», дадаў ён.

«Вялікі нафтавы танкер прайшоў каля 36 гадзін таму. Я думаю, у далейшым вы ўбачыце больш такіх», — сказаў спадар Райт на відэазапісе, апублікаваным у сацсетцы X. Па яго словах, так прэзідэнт ЗША Дональд Трамп «падтрымлівае стабільнасць сусветнай энергетыкі падчас ваенных аперацый супраць Ірана».

28 лютага ЗША і Ізраіль пачалі ваенную аперацыю супраць Ірана. У адказ Тэгеран абвясціў пра забарону на рух праз Армузскі праліў. Дональд Трамп заявіў, што ЗША гатовыя суправаджаць нафтавыя танкеры праз праліў. Армузскі праліў — адзіны выхад для экспарту нафты з краін Персідскага заліва.