Караблі пачалі перасякаць Армузскі праліў

• 10.03.2026, 21:28

Цэны на нафту працягнуць зніжацца?

Караблі ў Персідскім заліве пачалі перасякаць Армузскі праліў, гэта вынікае з дадзеных сэрвісу MarineTraffic.

Адзін з іх — нафтавы танкер Sunny Liger, які ходзіць пад сцягам Маршалавых астравоў. 8 сакавіка ён адправіўся з порта эмірата Фуджайра, а цяпер знаходзіцца ў Аманскім заліве.

Яшчэ адзін карабель — балкер KSL Laiyan, таксама пад сцягам Маршалавых астравоў, які 8 сакавіка выйшаў з Эль-Джубайля ў Саудаўскай Аравіі.

На гэты момант, згодна з картай, праліў перасякае кітайскае судна Run Chen 2.

Пасля пачатку аперацыі ЗША і Ізраіля супраць Ірана раніцай 28 лютага Тэгеран перакрыў Армузскі праліў, заявіўшы, што гандаль праз яго немагчымы да наступнага паведамлення.

10 сакавіка КВІР паабяцаў, што любая арабская ці еўрапейская краіна атрымае з заўтрашняга дня права на праход суднаў праз праліў, калі вышле амерыканскіх і ізраільскіх паслоў.