Вадзіцеляў аўтобусаў у Гомелі прымусілі аплачваць праезд у грамадскім транспарце

• 11.03.2026, 18:46

Іх няма ў пераліку льготнікаў.

Вадзіцеляў «Гомельаблаўтатранса» прымусілі аплачваць праезд, хоць увесь час яны ездзілі як пасажыры бясплатна, піша «Флагшток».

Як патлумачылі ў асяроддзі транспартнікаў, раней у Гомелі вадзіцелі грамадскага транспарту ў якасці пасажыраў ездзілі бясплатна як у гарадскім, так і ў прыгарадным грамадскім транспарце. Такое права ім давалі пры прад’яўленні службовага пасведчання.

Але з нядаўняга часу кантралёры «Гомельаблпасажыртранса» пачалі штрафаваць вадзіцеляў за неаплачаны праезд: маўляў, не маеце права. Матывацыя была такая, што ў пераліку льготнікаў няма вадзіцеляў грамадскага транспарту.

Аднак як такой льготы ў вадзіцеляў ніколі і не было — права на бясплатны праезд ім давалі, можна сказаць, з меркаванняў карпаратыўнай этыкі і лагікі. Цяпер жа пачалі выконваць «літару закона», вырашыўшы, што гэта важней.

«Але гэта абсурд — прадаваць талоны і самім жа іх выкарыстоўваць, каб дабрацца да працы», — лічыць суразмоўца.