Bloomberg: Іран страціў больш за 90% пускавых установак для ракет

• 11.03.2026, 20:26

Тэгеран цяпер вымушаны абапірацца пераважна на танныя дроны-камікадзэ.

Іран страціў больш за 90% пускавых установак для ракет у ходзе баявых дзеянняў супраць ЗША і Ізраіля, паведамляе агенцтва Bloomberg са спасылкай на амерыканскіх чыноўнікаў.

Праз страту пускавых установак Іран больш не можа масава запускаць балістычныя ракеты, як раней, і цяпер вымушаны абапірацца пераважна на танныя дроны-камікадзэ, паведамляе агенцтва.

Амерыканскія і ізраільскія вайскоўцы зрабілі стаўку на паляванне менавіта на пускавыя ўстаноўкі і камандныя пункты, а не на самі ракеты. Самі ракеты схаваныя глыбока пад зямлёй ва ўмацаваных сховішчах, і да іх складана дабрацца. А вось мабільныя ўстаноўкі і разлікі на паверхні аказаліся куды больш уразлівай мэтай. Гэтую стратэгію адпрацавалі яшчэ падчас леташняга канфлікту, і цяпер яна дала вынік, паведамляе Bloomberg.

За першы тыдзень баёў Іран выпусціў больш за 650 балістычных ракет, але многія з іх упалі на пустыя амерыканскія базы. Як піша Bloomberg Economics, Пентагон загадзя вывеў адтуль людзей і тэхніку, прадбачачы пачатак атак.

Тэгеран зрабіў стаўку на беспілотнікі Shahed-136. Іх можна вырабляць хутка і ў вялікай колькасці, і яны штодня атакуюць розныя мэты па ўсім рэгіёне — ад вайсковых баз да нафтавых аб’ектаў. Па хуткасці і магутнасці дроны саступаюць балістычным ракетам, але іх масавае прымяненне стварае для кааліцыі сур’ёзную праблему, лічыць выданне. Каб збіць танны «Shahed», даводзіцца запускаць дарагія ракеты-перахопнікі, якія каштуюць у дзесяткі разоў больш.