Трамп абвясціў пра перамогу ЗША ў Іране

• 12.03.2026, 8:57

Цяпер пытанне толькі ў тым, калі завершыцца аперацыя.

Прэзідэнт ЗША Дональд Трамп заявіў, што вайна супраць Ірана фактычна ўжо выйграная, і цяпер пытанне заключаецца толькі ў тым, калі менавіта завершацца баявыя дзеянні. Пра гэта ён сказаў журналістам падчас пералёту ў Вашынгтон, піша CNN.

«Я думаю, што мы ў вельмі добрай форме — галоўнае, што мы павінны выйграць гэтую справу, выйграць хутка, але выйграць», — заявіў Трамп.

Паводле яго слоў, многія каментатары ўжо лічаць канфлікт завершаным, і цяпер паўстае пытанне толькі пра тое, калі ЗША спыняць аперацыю.

Амерыканскі прэзідэнт таксама заявіў, што не хоча дапусціць аднаўлення пагрозы з боку Ірана. Ён дапусціў, што ў краіне павінна з'явіцца новае кіраўніцтва, здольнае аднавіць дзяржаву.

«Мы не хочам дазволіць гэтаму зноў адрадзіцца, і ў ідэале хацелі б бачыць кагосьці, хто ведае, што робіць — іншымі словамі, хто можа пабудаваць краіну», — сказаў Трамп.

Раней у той жа дзень падчас выступлення ў Кентукі прэзідэнт ЗША звярнуўся да сваіх прыхільнікаў са заявай, што вайна фактычна завяршылася яшчэ на пачатку аперацыі.

«Мы перамаглі. Мы перамаглі, у першую гадзіну ўсё скончылася», — заявіў ён, не прадставіўшы канкрэтных доказаў.

У той жа час у адміністрацыі Трампа гучаць розныя ацэнкі адносна працягласці ваенных дзеянняў. Сам прэзідэнт не адказаў на пытанне журналістаў, ці лічыць ён дагэтуль магчымым завяршэнне вайны на працягу чатырох тыдняў.